Stampa

di: Desfy

 

 

 

Tutti i ann, quand riva el mes de agost
mì vedi minga l’ora de scappà
lontan da la città
lontan dal lavoraa
in cerca d’on canton per rilassamm.
La valisa l’è pronta da ona settimana
mì spètti domà de sarala sù
finalment gh’è aria de villeggiatura
del lavoraa se ne parla pròppi pù.

Vedi giamò la rotonda in riva al mar
che la se illumina ògni sera
e mì che balli con la bèlla forestera
con la speranza de falla innamorà.

Son vegnuu anmò al sòlit pòst
e hoo trovaa i amis de l’ann passaa
in la stèssa pension del tipo familiar
indoe gh’è minga tròpp de risparmià;
me daroo da incoeu a la bèlla vita
me trattaroo ben come on milionari
me daroo de fà senza economia
per tutt i nòtt che me rèsta de passà.

Vedi giamò la rotonda in riva al mar
che la se illumina ògni sera
e mì che balli con la bèlla forestera
con la speranza de falla innamorà.

Ma da on poo a fà sciambola de nòtt
e al night per ballà voo rarament
gh’avevi l’entusiasmo adèss mì l’hoo perduu
de restà chì ne pòdi pròppi pù
e son stuff de passà in spiaggia la giornada
adèss mì son già negher ‘me on scorbatt
hinn pussee de quindes dì che mì son chì
e vedi minga l’ora de partì.

Saludaroo la mia bèlla forestera
che l’ha ballaa con mì la prima sera.