di: Aurelio Barzaghi

Con la foeuja de magnòlia
mì fasevi ona barchètta
e la vasca di giardini
l'era el mè tocchèll de mar
seri stèss d'on capitani
che sfidava i ond e el vent
la mia vasca di giardini
la mia barca mì... e nient.

E la prima sigarètta
con la barba de la loeuva
fada su con la velina
d'on fojètt de calendari
seri stèss d'on legionari
cont el did in sul grillètt
e i campann de l'oratòri
me ciamaven  per nagòtt.

Stòri, stòri inscì distant
faa de tappee che vola
de nani e de gigant
stòri, stòri che gh'hoo chi
in ona man sarada
che dèrvi on poo per dì.

Seri stèss d'on capitani
che sfidava i ond e el vent
la mia vasca di giardini
la mia barca mì... e nient
seri stèss d'on capitani
cont i botton de òr e argent,
ma la vasca di giardini
l'è sugada in d'on moment.

Seri stèss d'on capitani
cont i botton de òr e argent,
ma la vasca di giardini
l'è sugada in d'on moment.