Stampa

di: Aurelio Barzaghi

 

 

 

L'è rivada vestida de ròsa
la valisa de tela bordò
ona faccia de dònna vissuda
sèdes ann, fòrse sì, fòrse nò.

La cercava ona strada sicura
la cercava ona man per fà nass
el regal d'ona lontana sera
el regal d'on amor de strapazz.

‘me l'è fonda e scura l'acqua de sera
‘me l'è alt el pont faa de sass
‘me l'è longh el treno che passa via
el te lassa l'aria frèggia in di òss.

La cercava ona strada sicura
la cercava ona man per fà nass
el regal d'ona lontana sera
el regal d'on amor de strapazz.

E me l'è scur el ciel per lee stasera
gh'hann quattaa i stèll con tanti strasc
se pò poggiass al mur e borlà in tèrra
el vent l'è cald, ma el par on tòcch de giazz.

Hann troaa su i basèi de la gesa
ona valisa de tela bordò
gh'era denter on quaidun che vosava
e on bigliètt, s’te me voeuret son tò.