Stampa

di: Aurelio Barzaghi

 

 

 

Col computer in di saccòcc con la radio su i orègg
coi blue jeans a metà gamba stile pesca
coi cavei stèss d'on leon i adesiv in sul majon
la me par ona ventada de aria fresca.

La pedala su la bici per tegniss in esercizzi
e ògni tant la gh'haa de fà ona limonada
tant  per fà inrabì on quai vègg che ‘l passa in strada.

Aria ciara, aria nètta e on amor che le spètta
stèss de mì on quai ann fa quand gh'avevi la soa età.
Adèss sutti corr ‘me ona dannada
lavà e stirà e fà la spesa e tutt i strad hinn in salida
‘se gh’èmm de fà: l’è inscì che la va.

Cont on sacch che nostalgia cont on poo de fantasia
va penser che andèmm a fà ‘na respirada
casomai ghe piccomm lì ‘na ziffolada.

Aria ciara, aria nètta e on amor che le spètta
stèss de mì on quai ann fa quand gh'avevi la soa età
quand gh'avevi la soa età ...