Stampa

di: Lino Franzetti


 

 

 

Hann semper dii che la roeuda la gira,
ma nò mì a quèst gh’hoo mai pensaa
a mì che seri el ghèzz de la mia zòna
nanca ona tosa me son faa scappaa.
Guardi i amis che invèggen dì per dì
e pensi che ‘l sia giust, gh’hann i sò ann
me son guardaa in del spègg ona mattina
e lù el m’ha faa capii che l’è girada anca per mì.

Spariss i re, i regin e i sò castèll
i president, i Papa e anca i dòttor
e mì sto chì a menamm come on bamba
per i cavei che pèrdi dì per dì.
Poeu hoo capii la stòria de la roeuda
se la rotola là de pass ferraa
la fa fracass per minga fagh pensà
a la bèlla gioventù che l’è adree a andà.

Ma pensa tì son diventaa anca nòno
La gioia che ‘l coeur me fa s’cioppà
on fagottin de borotalco rosa
m’ha dislenguaa come ‘l zuccher filaa.
Adèss me guardi pù nanca in del spègg
me spèggi in di sò oeugg color del ciel
m’ha faa capì che anmò gira la roeud
fin che ‘l mond el seguttarà a girà.

Spariss i re, i regin e i sò castèll
i president, i Papa e anca i dòttor
e mì sto chì a menamm come on bamba
per i cavei che pèrdi dì per dì.
La… la… la….