di: Passo Duomo

L’era giamò de on quai ann
che me pareva de vèss content
ona pension che mantègn
mì, la mia dòna e l’appartament.
Lee l’è rivada on bèll dì
me son sentii subit in cros
el sò profumm l’ho sorbii
in de l’andron e in de l’ascensoeur.

Ti te saree la mia rovina
soo giamò che te see
come ona spina che da la corrent
se la fa pizzà el ciar
basta pòcch che te rèstet taccaa.

Mi me la sògni de nòtt
vestii legger, cont i pè biòtt
corr in sui praa fin a cà
senza fadiga, senza sudà.
Al diavol la mia miee
la me misura ‘sti quatter ghèi
in gesa la va de per lee
ghe gratti la tinta per i cavei.

Ti te saree la mia rovina
soo giamò che te see
bòna de famm fà di ròbb ch ‘l so pù,
ma se ghe pensi su
mì me senti s’cioppà de salud.                         

Ti te saree la mia rovina
soo giamò che te see
come ona spina che da la corrent
se la fa pizzà el ciar
basta pòcch che te rèstet taccaa.

Poeu l’ho spettada in su i scal
gonfi de glòria come un garzon
quand l’ha saraa sù el porton
hoo sentii in gola crèss el magon.
La m’ha vardaa e l’ha riduu
e mì hoo speraa che se gh’è on Signor
ch’el cascia giò duu saètt
de fulminamm coi scarp e i calzèett

Ti te saree la mia rovina
so giamò che te see
l’ultima pòrta sarada sul grugn
con la fòrza d’on pugn
che da tèrra te levet sù pàù.

El mè fusill l’hoo venduu
andavi a caccia ma hoo desmettuu
la scusa d’on pòver vigliacch
che de mazzass el gh’ha nò el coragg.
Sia maledetta l’età
minga per i acciacch e tutt i dolor
l’è che la te ciolla perchè
te lassa in del coeur la gioventù.