Stampa

di: Aurelio Barzaghi


 

 

 

Tutta la pòrta ne parla
el gh'haa la cavagna e la gerla
el dis ch'el vend i spinazz,
ma el cerca la luna in del pozz
tutta la pòrta ne parla
eren i dì de la mèrla
e tutta l'acqua in del pozz
l'era ona lastra de giazz
l'è lì che l'haa vist la soa luna
tutta rotonda 'me 'n piatt
òrca sidèlla stavòlta
la ciappi, la ciappi 'me on ratt.

Tutta la pòrta ne parla
el ciappa ona còrda el va giò
con la cavagna e la gerla,
giacchètta, cappèll e paltò
òrca miseria che rògna
mancava on tocchèll a rivà
òrca miseria che rògna
la còrda la tacca a girà.

E… gira, gira, gira lù de chì la luna de là
la par ona saonètta, la par ona saonètta
e gira, gira, gira lù de chì la luna de là
la par ona saonètta che voeur minga fass ciappà.

El dis fòrsi l'è mèj
che spètti el mes de luj
che inscì la se dislengua,
che inscì la se dislengua
la ciappi col sidèll,
la tègni denter lì
la tacchi sù in cusina e me la bevi on poo per dì.

Tutta la pòrta ne parla
l'era la voeuna de nòtt
ne la campagna che dòrma
se sent la sidèlla che sbatt
el vosa “l'ho presa! l'ho presa!
l'è mia, l'è mia, l'è chì!”,
ma la sidèlla l'è busa e la luna la scappa de lì.

E ..... pòrca miseriassa el s'è incazzaa come ona bissa
el tacca a corr 'me on treno
per fà passà la stizza
poi dice “questa luna non la voglio proprio più”
fèmm passaa ona settimana e ghe darèmm on oeugg al sô.

E ..... pòrca miseriassa el see incazzaa come ona bissa
el tacca a corr 'me on treno
per fà passà la stizza
poi dice “questa luna non la voglio proprio più”
fèmm passaa ona settimana e ghe darèmm on oeugg al sô
fèmm passaa ona settimana e ghe darèmm on oeugg al sô
fèmm passaa ona settimana e ghe darèmm on oeugg al sô.