Stampa

di: Luigi Carcano; Sergio Parisini


 

 

 

La fiorista de Piazza Fontana,
on doninn tanto bèll e grazios,
madonnina faa sù in d'on sciallètt
quand el temp a stà al frègg le condana.
Cont el sô la và in cerca d'ombria
al ripar del sò vègg ombrellon.
E a la gent che la passa de via,
la ghe vend i sò fior de stagion.

Lù bèll scior, ma ch'el guarda i color
tanto frèsch di mè ros
coltivaa in d'on giardin
cont i man delicaa d'ona fata.
I mè vioeul, par che parlen
e disen sincer a la gent
l'espression d'on penser
senza nanca bisògn de paròll.

Tutt i dì lee la cunta 'na stòria,
l'è 'na scusa per digh ai client
i provèrbi di fior del giardin
tramandaa di sò vègg a memòria.
Cont i fior lee la vend la magia
a chì cred ai fortunn del destin
e ghe dà, per chi voeur, l'armonia
di segrett che nascond on basin.

Lù bèll scior, ma ch'el guarda i color…

Ma però, cont on sorris,
la scond sòtta i oeugg de la gent,
la speranza che moeur.
E ghe resta in del coeur el dolor.

Lù bèll scior, ma ch'el guarda i color…