di: G.Margorani - U.Marino

Ve cunti ona stòria,
ve giuri, l’è vera
succèssa in del bar indoe foo la cassera
l’è on bar di paraggi de Pòrta Romana
gh’è gent ‘me se dev,
gh’è gent on poo strana.
L’è staa ona sera vèrs i noeuv e on quart
mì seri adree a fà on poo de cunt de cassa
quatter client giugaven anmò ai cart
el mè padron el lavava ona quai tazza:
ven dent’ la Gianna a bev el sò cafè
la se lamenta del sò laorà,
la me inciocchiss con tutt i sò perchè
l’è ona battòna e mì ‘se pòdi fà?

Se dèrva on tratt la pòrta del bistrot
ven denter vun con la rivoltèlla
duu colp bèi sècch, la Gianna la va giò
sangh e cafè mis’ciaa su ona piastrèlla
lù el scappa via senza sarà la pòrta
mì corri là, la Gianna la se moeuv
ven la Volant, ma lee l’è minga mòrta
mì la carèzzi intant foeura pioeuv.

Che razza de stòria, ve ‘l giuri, l’è vera
Signor ma che rògna, che tragica sera
la Gianna battòna adèss l’è in pension
e lù l’ha beccaa des ann de preson.
Mì foo la cassera a Pòrta Romana
l’è on bar indoe ghe batt gent seria,
gent strana.