di: Passo Duomo

Ottavio Gingipalla vegnuu grand cont el risòtt e col conili, el pèss al venerdì
faseva la merenda in del campètt, col pan e la bològna, perchè se usava inscì.
Finchè on dòpomezzdì  s'è miss insèma a Galimberti Loredana, ona vegana
e inscì l'ha lassaa pèrd tutta la polpa per 'na tosa de vint'ann.
Lee la voeur ‘n omètt in pièna forma, sportiv e anca bronzaa, reclàme de la salutt
che l'abbia dii de nò al colesterolo, al grass e a la panscètta per mangià domà verdur.
Ottavio per amor come San Peder rinnega in tutta frètta, òssbus e cotelètta
per diventà el templar de la cicòria, profètta del fenòucc.

Ahi! Ravanèi e remolazz
per trii palanch con barbabietol e spinazz.
Ahi ahi ahi vegetale mon amour
se pò campà domà a fasoeu e peveron?

Quand el va a disnà dalla soa mama, riscia 'l nas la Loredana, ghe dà dree el scartozzin
e per la digestion ona tisana de malva e valeriana per fà tanta plin plin
tutta quèlla fibra in de la panscia ghe spurga giò i busècch e 'l schirla come i òcch
pòer fioeu color de limonada coi oeugg de martinitt.
L'è de giovedì che il buon Ottavio el domanda in de la ditta on ora de permèss
per fà la sorpresa alla morosa: in d'on mazz de scolcionera voeur fagh troà l'anèll
quand el torna indree bòrla tusscòss, su i dent la gh'è rivada 'na pertegada:
Lory che la ciolla col Marcello, el garzon del maccelàr!

Ahi! Ravanèi e remolazz
per trii palanch con barbabietol e spinazz.
Ahi ahi ahi el vegetal s'è vendicaa
su 'n pòer pantolla senza dòna e senza cà.

Ottavio cont el coeur in mila tòcch, de per lù in de la cusina, almen la fa finida
sbassa i gelosii e smòrza el ciar poeu el ciama la soa mama per digh ch’el ghe voeur ben
adèss se vòlta i manigh fin al gombet, deslazza l'orelògg e ciappa sù on cortèll
coi oeugg che ghe caragnen da on bèll taj......a 'na fètta de salamm.
Cara Loredana seri stracch
de fà 'na dietta come i pegor ed i vacch
ma se me brusa la mancanza de rispètt
de famm mangià ona montagna de cornètt.

Dèss m'è pussee ciar anca el concètt
te pias la carna che se sgagna dent al lètt
doo i dimission da la congrega di vegan
e voo a fà el ciuff a la miee de l'ortolan.