di: Nino Rossi

Dòpo ona nòtt d’amor, in on mòtel,
la “casta” segretaria e l’industrial,
slongada in tèrra, ai margin de la strada,
veden ‘na maggia bianca insanguinada.
Visin al còrp massacraa, brusa ona gòmma.
Fann nanca finta, tant, l’è ona battòna.

Tutt’ i ser el sò còrp la vendeva,
per comprà on fals amor per on’ora,
per quèll’ora che lù la stregava,
la mandava tuscòss in malora.
Tanti sògn ligaa insèma in “boquet”
calpestaa, poeu, sul sporch marciapee.

Quattada da ona giacca d’on barbon,
l’hann vista i dònn che andava a l’orazion.
Gh’è minga staa per lee paròla bòna,
domà on’oggiada e via. L’è ona battòna.
Per ona prostituta massacrada,
l’è fina tròpp ‘na giacca on poo slisada.