di: Popolare

Ona Balilla me seri compraa
quand mì seri anmò on sbarbaa,
ma la m’è durada pòcch
me l’hann rostida a tòcch a tòcch.

Avevi faa sù ona pigna de grana
vendevi gelati cont sù tanta panera
vegniva i fiolètt de tutt i rion
ògni dì ne vendevi trii ò quatter bidon.

In del meccanich de macchin usaa
sta bèlla Balilla me seri compraa
a l’era lustra col pomis stirada
e mì content a cà l’hoo portada.

Foo nò in temp a lassala de foeura on moment
a guardalla se ferma tutta la gent
se ved che a on quaivunn ghe tira la gola
e lì, sù i duu pee, el còfen el vola.

Ohvei che mì che di lader a gh’hoo paura
pianti ona corsa e voo in Questura
quand torni indree doo i numer al lòtt
gh’è lì la mia macchina senza cruscòtt.

In del tragitto Loreto-Lambraa
la gòmma de scòrta m’hann già spaventaa
e nel ritorno Lambrate-Loreto
i fari li prese un certo Anacleto.

El paraurti le pèrdi per via
insèmma al rèst de la carrozzeria
el spinterogeno inscì delicaa
l’è andaa finì in de la borsa d’on disperaa.

Pòrca miseria che confusion
el radiator el me va sul ballon
amici miei, voi forse non credete
me se dislengua de colp el magnete.

On alpinista de quèi de cordada
el ved la Balilla el fa la scalada
el strèppa el volant, le guarda, le pesa
e poeu, con calma, el fa la discesa.

Foo ona cioccada cont on tramvier
el ven giò de corsa el me strèppa i porter
el sò contròll l’è lì che le guarda
e con fà elegante el me frega la targa.

L’avevi tòlta per andà a spass,
ma varda tì la pareva de giazz
l’è nanca trii dì che l’avevi comprada
e per trii quart la sera già dislenguada.

Me gratten l’òli, s’ingrippa el motor
me ròben l’acqua col sò radiator
resta el motor senza pù la testada
la guarnizion la s’è tutta brusada.

Me spariss la tromba, ven via el còll d’òca
i fodrin con la pelle de fòca
me rèsta lì domà duu ò trii tocchèi
beh, mì i hoo ciappa e hoo traa via anca quèi.

Se gh'hoo de fà?