di: Popolare

Mì gh’avevi ona bèlla Balilla
foderada de pèll d’anguilla
ve cunti la stòria de come l’è ‘ndada
che in trii minutt me l’hann dislenguada.

Prima ve disi el mestee che foo mì
cominci ai des or e finissi a mezzdì
vendi la soda, lisciva e savon
e de danee ne foo sù a monton.

Giri la baia col mòtoforgon
con candeggina, pajètta e palton
foo sù ona pignatta de cart de milla
me salta in del coo de comprà la Balilla.

Pòrti la macchina sòtta la pòrta
me gratten subit la roeuda de scòrta
la spòsti on ciccin, la pòrti in via Larga
passa on quaidun che me gratta la targa.

Poeu passa i tedèschi, sliffet e slòffen
vann su la vettura e me mangen el còfen
ciami i ingles per casciai via
me paccent tutta la carrozzeria.

Passa on fiolin, bèll ma senza dentin
che ‘l me disvida tutt i lampadin
el me fradellasc quèll malaa de diabete
el fa finta de nient el me mangia el magnete.

A visitall el vegn foeura el dottor
che ‘l me mangia el radiator
per rispètt a la scienza ghe disi nagòtt
e lù, per dispètt, pòrta via anca el cruscòtt.

Ohvei, ma te disi mì, ma l’è ròba de matt
la par la Balilla de ciccolatt
a voo in Questura per denuncià el dagn
quand torni indree gh’è pù i pedann.

El mè portinar che ‘l pòrta i oggiai
el salta in vettura el me mangia i fanai
e la soa miee, sì, quèlla l’è fina,
la m’haa bevuu foeura tutta la benzina.

Ohvei, me ne combinen de tutt i color
a troevi pù nanca on tòcch de motor
ona brutta faccia de delinquent
el me mangia el tubo de scappament.

A voo per caso a trovà mia sorèlla
ghe troeuvi in cà on piston e ona bièlla
rèsta in tèrra trii tocchèi
passa el spazzin pòrta via anca quèi.