di: Giorgio Mangano
 

Voeuri parlà, voeuri cantà a tì
ai tò vint’ann, al tò faccin de sô
però sòttovos che nanca el vent el sent
quèll vent che ‘l moeuv i mè cavèi tucc gris
el paradis.

Alzi la vos, me foo coragg: “Bellee
scusom, ma sont innamoraa de tì:
l’è come on sògn, el soo gh’è nient de fà,
ma l’è inscì bèll a la mia età sognà
l’eternità”.

Adèss rid nò che te see chì con mì
lassom sognà te parli anmò sòttvos
l’amor se dis che ‘l gh’abbia nò età,
ma tì te seet andada via già
la realtà.

Ghe rèsta el coeur che ‘l canta anmò a tì
gh’è pù de vos, gh’hoo pù coragg, finii.
S’è smorzaa el sô, la luna la gh’è pù
l’era on bèll sògn e semper inscì el sarà
innamoraa.

Innamoraa… el paradis
Innamoraa… l’eternità
Innamoraa… la realtà
Innamoraa…
Innamoraa de tì