di: L.Moretti; D.Megna; A.Talia
 

In d’ona pèrla preziosa voeuri mètt
el regal strepitos de l’incontrass
inscì de mètt insèma de scambiass
mila stòri de esperienz divèrs.
Pòden vèss de giòia ò de dolor
tanti maner de pensà e de donà
ona ricchèzza inmensa de guarnà
dent in de l’anima de l’umanità.
Voeuri fissà in la ment tutt i sembianz
e i sguard de tanta gent stupenda
che sul mè sentee mì hoo incontraa
e tanti bèi emozion m’hann regalaa.

Con ‘sti pèrla prezios ona collana
de mètt al còll lunghissima faroo
e lor col sò color che ‘l par d’argent
sberlusarann, gh’hann de s’ciarii el nòster mond.
Proeuva palpabil de sentiment stupend
trovà ona man de streng cont amicizia
tegnì in del coeur ‘sti pèrla de valor
savè che a la fin dominarà l’amor.
Voeuri fissà in la ment tutt i sembianz
e i sguard de tanta gent stupenda
che sul mè sentee mì hoo incontraa
e tanti bèi emozion m’hann regalaa,
m’hann regalaa.