di: Aldo Aldi
 

La mia miee che la fa la strascera
in mèzz ai strasc la bev el Barbera
mì rivi a cà che son stracch ‘me on dannaa
pòrco sciampin gh’è nagòtt de mangià.
E lee la ronfa a l’è in brasc al Morfeo
mì la scorlissi e la fa: “Ciao Romeo”
poeu la me guarda con l’oeugg de pan pòss
e la me dis: “Te prepari on quaicòss”.

Famm duu spaghètt con l’aj e con l’òli,
ma sbaglies minga cont el petròli
se nò quand pizzi la sigarètta
foo foeugh e fiamm per circa on orètta.
E tutt i ser a l’è ‘sta menada
la me dis: “Scusa me son sbagliada”
ohei, ma son mì che gh’hoo de mangiai:
spaghètt, petròli e on ciccinin d’aj.

Incoeu l’è fèsta, gh’è ‘l ròst in del forno,
cont i patati a tocchèi de contorna
intant che foo ‘l bagn senti on bèll zabettà
a l’è la Pina, visina de cà.
E lor cicciaren pussee d’on orètta
quand vègni foeura la mia Giuliètta
la vègn incontra con fà tutt commòss
gh’è brusaa ‘l ròst, te prepari on quaicòss.

Ma famm duu spaghètt...