Stampa

di: Margorani G.; Desfy
 

 

 

Adèss che ‘l temp del ner l’è già passaa
e in di cavèi gh’è tanti fil d’argent
l’è bèll pensà ai sògn che tutti èmm faa
e che gh’èmm semper avuu in la nòstra ment.
Ghe pensi, ma con gran tranquillità
perché m’hann procuraa di bèi moment
magari on quai filin de nostalgia gh’è
che ‘l fa ninnà pian pian i sentiment.

‘Me l’era bèll de sera andà e in compagnia cantà
ona ghitara e tanti amis insèma a divertiss
cantavom tanti bèi canzon e me piaseva inscì
stòria passada, però restada e ravvisada in de la ment,
stòria on poo vèggia, ma semper viva che restarà con mì.

I fil d’argent adèss hinn bon amis
me da confòrt in di mè sensazion
mì me contenti e voo cont el mè vent
e ciappi quèll che passa el mè convent.
Sarà che in fond la vita la me da
quèll che me basta inscì mì son content
i cavèi gris se veden, ma se senten nò
voo avanti ben senza nissun però.

musica

Stòria passada, però restada e ravvisada in de la ment,
stòria on poo vèggia, ma semper viva che restarà con mì.

I fil d’argent gh’hann minga pes
anca se gh’hinn fann nò difètt
ghe voeuri ben e son distes
ògni ann che va, el va bèll quiètt:
voo avanti inscì, problemi nient,
ma tègni i mè cavèi d’argent.