di: Barzaghi Aurelio
 

Hoo vist on pret che ‘l ballava el boogie
in compagnia d’ona suora e on fraa
hoo vist on pret che ‘l ballava el boogie
el fraa però l’era giamò s’cioppaa
la suora inveci la resisteva
e la cantava ye-ye-ye-ye
la suora inveci la resisteva
e la cantava ye-ye-ye-ye-ye.

On dì qualunque, on dì de fèsta
con tanta gent a la finèstra
che la guardava senza fiaa
el pret, la suora e ‘l fraa.

Adasi, adasi, ma l’hann capida
tutta la gent l’è andada in strada
l’è andada in strada per ballà
col pret, la suor e ‘l fraa.

On fioeu con l’aria on poo meravigliada
la bocca sporca de marmellada
par minga vera guardà quèi grand
che van d’accòrd istèss di sant.

musica

Hoo vist on pret che ‘l ballava el boogie
cont ona fòto del Mao-Tze-Tung
el fraa el ballava con la Regina
la suora inveci coi vu-comprà
ona mattina de primavera
quand la natura l’è adree a spontà
gh’è vun in ciel che ‘l diseva:
“Sì, l’è quèst el mond che vorevi mì”:
gh’è vun in ciel che ‘l diseva:
“Sì, l’è quèst el mond che vorevi mì”

E poeu l’ha dii duu Pater e on Glòria
a tutt el mond e a la mia stòria.