di: G. Mangano
 

Col sô e con la luna
fee vedè di gibigiann
col sô e con la luna
a nassen i penser.

Paròll che se diseven ona vòlta
e situazion che adèss se viven pù,
ma proeuva tì a sentì dent ona scòla
gh’è nanca vun che parla milanes
se senten i bagai on poo in difètt
a gh’è nissun che ghe insègna el sò dialètt.

Nel mè coeur gibigiann
verità de Milan
verità de Milan
nel mè coeur gibigiann.

Per vun ‘me mì nassuu a Pòrta Cicca
e milanes de sètt generazion
a l’è normal de vèss innamoraa
del gran Milan, sì de la mia città
del dì come de nòtt però se sa
andà in gir bisògna vèss assicuraa.

Nel mè coeur gibigiann
verità de Milan
verità de Milan
nel mè coeur gibigiann.

La Sisal, el Totip e l’Enalotto
i lotterii e tanti alter ròbb
la vita toa la pò cambià in on bòtt
l’è assee ch’ el vègna on numer giust al lòtt
e, all’improvvis, l’è tutt on brascià sù
parent e amis mai vist nè conossuu.

Nel mè coeur gibigiann
verità de Milan
verità de Milan
nel mè coeur gibigiann.

Quanti paròll, promèss, proponiment,
iniziativ de solidarietà
in cèrti dì de l’ann per bòna sòrt
Natal, Epifania e dì di mòrt
magnen i poveritt e i senza tècc
per ricordà i nòst’ mòrt, i nòster vègg;
se smòrza el sô, gh’è andaa via la luna
anca i penser hinn stracch vann a dormì
sparissen per on poo i gibigiann,
ma tornerann a parlà del nòst’ Milan.

musica

Ròbb che vègnen e che vann
hinn domà gibigiann.