di: Claudio Merli
 

Hoo sbagliaa a infilà l’oggioeu
cont el fil de la mia vita
e rangiass a tirà innanz
l’ho imparaa in mèzz a la strada.
On bèll mond faa de illusion
l’era tutta la mia stòria,
fin a quand on bèll moment
l’è rivada on poo de glòria.
E per nò brusà el pajon,
pròppi, intanta che la gira,
grondanent d’ispirazion,
mì desquatti la poesia.

In del coeur gh’hoo ‘na canzon
nassuda sù i bastion de la mia nostalgia;
l’espression d’on vagabond
che ’l cerca in di canton de la soa fantasia.
E pensand al mè Milan
che inscì pian pian el moeur
che ’l cambia la soa storia…
mì cammini in de la nòtt,
senza capì nagòtt
sù i al de la memòria.

musica

E girand per la città,
inscì, con pòca vos,
inscì, senza pretesa;
cont ona ghitara in man
mì sòni per Milan ‘sta “Giava Milanesa”.