Stampa

di: G.Brassens - N.Svampa
 

 

 

A travers el gabbion del circo
i donnètt de tutt el rion
ghe vardaven adree al gorilla
'dess ve disi anca la reson:
s'eren miss pròppi tucc in fila
davanti a l'esposizion
d'ona ròba che pòdi nò dilla
ona roba de fà impression.
Dàgh al gorilla!

A on bèll moment el gabbion de lègna
el s'è ròtt e 'sto bèll bestion
l'ha sentii l'odor de campagna
l'ha ciappaa e l'ha saltaa i bastion.
El scimbion in del vegnì foeura
“Pòdi nò stà chì saraa sù -
el vosava – mì incoeu son vergin,
ma doman voeuri vèssel pù”.
Dagh al gorilla!

I pajasc e'l padron del circo
hinn staa i primm a sentì l'odor
“Ahi, ghe sèmm, stà a vedè el gorilla
ch'el gh'ha voeuja de fà l'amor”.
Tucc i dònn quand gh'hann dii la stòria
ch'el scimbion l'era adree a cercà
sarà stada anca la paura
s'hinn stremii e hann comincià a scappà.
Dagh al gorilla!

Anca quèi che on quart d'ora prima
le vardaven con duu oeugg inscì
hinn scappaa, l'è la coerenza
che ghe manca a quèlla gent lì.
Sarà stada anca l'ignoranza
fatto sta se ‘l saveven guai
ch'el gorilla a portall in stanza
del marì l'era mòlto mèj.
Dagh al gorilla!

In la strada intant che i alter
se scondeven per fall passà
se vedeva domà ona vèggia
cont on giudes che andava a cà.
El scimbion el se varda intorna
poeu el comincia a pontà decis
tucc i dònn eren giamò in stanza
chi duu lì eren anmò vestii.
Dagh al gorilla!

La veggèta la sospirava
“Beh... el pò vèss che ghe piasi mì,
l'è on poo foeura de l'ordinari
ma ai mè temp...” e la resta lì.
Anca el giudes el se moeuv minga
tant el pensa: “Va ben che son brutt
ma 'l pò nò ciappamm per 'na scimbia”,
stagh attent che l'ha sbagliaa tutt.
Dagh al gorilla!

'Dèss fa finta che vun el disa
catta foeura o de chì o de là
ciappa el giudes oppur la vèggia
ghe n'è inscì che sann nò se fà.
Mì per mì gh'hoo pensaa anca sora
ciappi la vèggia, nanca parlànn
specialment adèss che l'è dura
che anca mi gh'hoo giamò i mè ann.
Dagh al gorilla!

El fatto l'è che anca se 'l gorilla
el var el prèzzi de fagh l'amor
el sann tucc che in definitiva
el pò minga vèss spiritos.
Inscì inveci de toeu la vèggia
come avarissom faa fòrsi tucc
l'ha ciappaa el giudes per l'orèggia
e l'ha portaa insèmma a lù in del bosch.
Dagh al gorilla!

Se voo avanti a cuntav la stòria
gh'è de rid, a ve 'l disi mì
me dispias pòdi minga dilla
beh, in sostanza l'è andada inscì:
al moment pussee bèll el giudes
El vosava “Mamma Gesù”
come quèll che l'altr'er ai vùndes
l'hann piccaa e poeu l'hann saraa sù.
Dagh al gorilla