Stampa

di: Aurelio Barzahi
 

 

 

Gh’è ona mama che la prega
che la prega de nascòst
per on fioeu che l’è andaa via
con la maschera anti-gas.
Gh’è ona mama che la prega
e intant la mètt a pòst
quattro sassi colorati
d’on lontan mes d’agost.
Gh’è ona mama che la prega
e la cerca de capì
quelle scritte con su “pace”
chissà mai se voeuren dì?!

Din don don l’è partii perchè l’è on òmm
Din don dan senza barba ‘me i tosann.

Gh’è ona mama che t’ el see
quand l’è ora de andà in lètt
tutt i vòlt la guarda i or
e la dis: “L’è ancamò prèst”.
La prepara ona tazzina
cont on poo de cafelatt
la se sètta giò in cusina
e la parla cont i piatt.
Gh’è ona mama che la spera
che ‘l so fioeu l’è dree a dormì,
ma chi l’è che dòrma in guèrra?
Oh, Signor, guardomel tì!

Din don don l’è partii perchè l’è on òmm
Din don dan senza barba ‘me i tosann.

La ghe fa ona ninnananna
come la faseva on dì
poeu la sara la persiana
e la dòrma insèma a lù.
Gh’è ona mama che la prega
e la cerca de capì
quelle scritte con su “pace”
chissà mai se voeuren dì?!

Din don don l’è partii perchè l’è on òmm
Din don dan senza barba ‘me i tosann.