Stampa

di: Walter Valdi
 

 

T'hee sentii 'se gh’è succèss?
Una cosa straordinaria.
L'hoo savuda pròppi adèss:
l'hann trovaa col nas per aria.
L'era là in Piazza del Dòmm
ch'el saveva pù 'se fà,
el girava 'me on pòr òmm,
ma el saveva nò in dove andà.

T'hee sentii 'se l'è success?
Una cosa eccezionale!
Me par vera nanca adèss.
Gh'è 'rivaa el Telegiornale!
Gh'è vegnuu giò el giornalista
per cercà de fall parlà.
Gli hanno fatto l'intervista,
ma gh'è staa nagòtt da fà.

Ma a la fin se po' savè 'se gh'è succèss, pòrco d'on can?
Han trovato un milanese chì a Milan!
Ma va!?
Han trovato un milanese chì a Milan.

Lù el cercava de parlà,
ma nessuno lo capiva.
Dòpo on poo l'ha lassaa stà.
Sì perché se nò impazziva.
Gh'era tutt pien de baresi,
piemontesi e sicilian...
e se nò eren genovesi,
calabresi ò venezian!

Gh'era finna uno Zulù
e vun de la Polinesia.
dello Zambia eren in duu;
gh'era vun de la Rodesia.
C'era chi parlava il turco,
chi el parlava l'australian,
ma nessuno che parlasse
il dialetto de Milan!

E per forza! Chi ‘l podeva sospettà, pòrco d'on can,
di trovare un milanese chì a Milan!
oh già!
Di trovare un milanese chì a Milan.

Fòrsi el mètten in d'on stand
a la Fiera Campionaria.
Fòrsi el mènen al Museo,
el mètten là col nas per aria.
Fòrsi el mètten in riserva
come se fà cont i Indian,
come fosse un pellerossa
invece che vun de Milan.

Fòrsi invece el mettarann
ai Giardini in d'ona gabbia
inscì poeu tutti andarann
a vedèll s'cioppà de rabbia,
a vedè com'è ch'el mangia,
se ghe pias la carna ò el pèss,
se el stà lì come on pantola
ò l'è viscor de riflèss

Inscì almen se podarà vegnì a savè, pòrco d'on can,
com'è fatto un milanese de Milan
Oh sì!
Come è fatto un milanese de Milan!

Parlato:
Ah, l'è minga vera... Era uno scherzo...

Di milanesi ce n'è ancora... oh! Per esempio...
c'è il Sindaco... No, quèll lì nò perché el ven de...
C'è il Sovrintendente alla Scala...
el Capp di Ghisa...
No, nanca chi lì, perché vun el ven de... e quell'alter el ven da...
D'altronde Milano è una metropoli, dunque è giusto così...
C’è gente che va, gente che viene...
Certo che, se andiamo avanti anmò on poo, va a finire che per de bon ai Giardini Pubblici on dì ò l'alter fann sù on alter recinto e me mètten la con sù on cartèll:
HOMO MILANENSIS... e intorna tutt'i alter a rid
E vialter ona vòlta ò l'altra ve vegnarà dedree vun ch'el ve piccarà in sù la spalla
e poeu el ve disarà:

T'hee sentii 'se l'è success?
Una cosa straordinaria.
L'hoo savuda pròppi adèss:
l'hann trovaa col nas per aria.

Ma a la fin se po' savè 'se gh’è success, pòrco d'on can?
Han trovato un milanese chì a Milan.
Ma va!
Han trovato un milanese chì a Milan!