di: Walter Di Gemma
 

Savii se gh’è succèss al sant Ambroeus?
Lù l’è scappaa de nòtt foeura Milan
perché el voreva nò vèss nominaa
Vescov de ‘sta città.
Con la soa mula Betta l’ha trottaa
dirètt vèrs i campagn del varesòtt
in mèzz a tanti bosch l’ha cavalcaa
pensando de fà ben a fà fagòtt.
E l’è scappaa senza pensà
che i strad di vòlt hinn minga giust
a la Betta el ghe vosava, ma de gust.

Corr Betta, corr Betta, corr
a l’alba lù el s’è trovaa
corr Betta, corr Betta, corr
fin intorna ai mur de la città
foeura Milan l’è mai andaa.

I Milanes content l’hann portaa indree
intanta che l’Ambroeus senza dì nient
in testa el complottava on alter pian
per ‘lontanass anmò dal nòst Milan.
Per minga sbaglià stada e fass ciappaa
el sant Ambroeus per longh l’è staa sospètt:
a la soa mula Betta, se l’ha faa?
El gh’ha feraa al contrari i zoccorètt.
E l’è scappaa in gròppa a lee,
ma i Milanes l’hann pedonaa
perchè el sentiven in la nòtt vosà.

Corr Betta, corr Betta, corr
che i Milanes hinn dedree
corr Betta, corr Betta, corr
mì voeuri nò vèss vescovaa
Betta ste gh’hee? Ste voeuret fa?

La Betta l’ha pontaa i sciampètt dedree
la s’è fermada in mèzz a quatter cà
l’Ambroeus el ghe vosava: “Ma ste gh’hee?
Dai Milanes te voeuret famm ciappà”.
L’Ambroeus l’è tornaa indree,
me tutti sann
per diventà el vèscov de Milan
incoeu in del stèss pòst tra i quatter cà
indoe la Betta i sciamp l’ha ben pontaa
gh’è on bèll paes e in sul cartèll
gh’è scritt el nòmm che fa pensà
al sant Ambroeus che l’era adree a scappà.

Corr Betta, corr Betta, corr
che i Milanes hinn dedree
corr Betta, corr Betta, corr
mì voeuri nò vèss vescovaa
pròppi a Corbètta l’hann ciappaa
pròppi a Corbètta l’hann ciappaa
pròppi a Corbètta l’hann ciappaa.